Data: xullo de 2013
E chegamos ao número 10 do ‘Arredista!’, que o MGS leva a editar desde o ano 2009. As propias datas de aparición, alén dun número especial -na xa histórica asemblea de Amio-, dan conta dos eixos que guían a revista: o 1º de maio, dia do Internacionalismo Proletario, e o 25 de xullo, día da Patria Galega, nacionalismo e internacionalismo como dúas faces da mesma moeda que representan na Galiza a loita pola soberanía e independencia nacionais e a loita da clase traballadora e o conxunto das clases populares galegas polo socialismo.
Nestes cinco anos foron ducias as persoas que colaboraron cos seus artigos e a través de entrevistas a botar luz sobre os temas mais importantes en cada momento ou achegando análises ideolóxicas de fundo. No número do día da Patria de 2013 que estás a ler pretendemos seguir fornecendo de elementos de reflexión tais como a nosa posición sobre a UE, a nova iniciativa Galiza pola Soberanía, como afecta a crise á emancipación de xénero, a defensa do territorio, a solidariedade internacionalista ou as iniciativas de construción nacional entre outros contidos. Como sempre, boa leitura!
